ឯកឧត្តម ឡាយ វណ្ណៈ អភិបាលខេត្តតាកែវ បាននាំមកនូវអង្ករ និងមីជូនដល់ប្រជាពលរដ្ឋក្រីក្រប្រភេទក្រ ១ និងក្រ ២ ចំនួន ២០៥គ្រួសារ នៅក្នុងសង្កាត់រកាក្នុង ក្រុងដូនកែវ

ភាពប៉ិនប្រសព្វ និងវៃឆ្លាតក្នុងការទំនាក់ទំនង ព្រមទាំងការយកចិត្តទុកដាក់ខ្ពស់ចំពោះប្រជាពលរដ្ឋរបស់ឯកឧត្តម ឡាយ វណ្ណៈ អភិបាលខេត្តតាកែវ បាននាំមកនូវអង្ករ និងមីជូនដល់ប្រជាពលរដ្ឋក្រីក្រប្រភេទក្រ ១ និងក្រ ២ ចំនួន ២០៥គ្រួសារ នៅក្នុងសង្កាត់រកាក្នុង ក្រុងដូនកែវដោយមួយគ្រួសារទទួលបាន អង្ករ ២៥ គ.ក្រ និងមី ១កេស សរុបចំនួន ៥,១២៥ គ.ក្រ និងមី ២០៥កេស។ ក្នុងនោះអង្ករចំនួន ៣តោន បានទទួលពីអំណោយសប្បុរសធម៌របស់ក្រុមអាជីវករថៃ ដែលមកចូលរួម តាំងពិព័រណ៍ពាណិជ្ជកម្មកម្ពុជា-ថៃ នៅខេត្តតាកែវ តាមរយៈការស្នើសុំរបស់ឯកឧត្តមអភិបាលខេត្ត រីឯ ២តោន ១២៥ គ.ក្រ រួមទាំងមី ២០៥កេស ទៀតគឺជាអំណោយផ្ទាល់របស់ឯកឧត្តម។
ឆ្លៀតឱកាសដែលអញ្ជើញជាអធិតីក្នុងពិធីចែកអំណោយនេះ ដែលបានប្រព្រឹត្តទៅនៅបរិវេណសាលាក្រុងដូនកែវ នារសៀលថ្ងៃទី០៣ ខែកញ្ញា ឆ្នាំ២០១៥ ឯកឧត្តមអភិបាលខេត្តបានផ្តាំផ្ញើរបងប្អូនឱ្យចេះស្រលាញ់រាប់អានគ្នា ជាមួយអ្នកជិតខាងរបស់ខ្លួនក៏ដូចជាប្រទេសជិតខាង ពីព្រោះការចងមិត្តតែងតែប្រសើរជាជាងការចងសត្រូវ។