ឯកឧត្តម អ៊ូច ភា អភិបាលខេត្តតាកែវ រួមដំណើរដោយប្រធានមន្ទីរជំនាញពាក់ព័ន្ធ នៅរសៀលថ្ងៃព្រហស្បតិ៍ ៧ កើត ខែទុតិយាសាធ ឆ្នាំច សំរឹទ្ធិស័ ពុទ្ធសករាជ ២៥៦២ ត្រូវនឹងថ្ងៃទី១៩ ខែកក្កដា ឆ្នាំ២០១៨ បានអញ្ជើញចុះត្រួតពិនិត្យពីស្ថានភាពទឹកជន់នៅតាមផ្លូវជាតិលេខ២ ក្នុងភូមិសាស្ត្រស្រុកសំរោង ខេត្តតាកែវ ថាតើមានការលិចលង់ផលដំណាំ នឹងផ្ទះសម្បែងរបស់ប្រជាពលរដ្ឋឬយ៉ាងណា ជាពិសេសគឺត្រៀមលក្ខណៈក្នុងការជួយសង្គ្រោះប្រជាពលរដ្ឋ ឲ្យបានទាន់ពេលវេលា នៅពេលស្ថានភាពទឹកហក់ឡើងខ្ពស់។
ឯកឧត្តមបានណែនាំដល់អាជ្ញាធរ និងមន្ទីពាក់ព័ន្ធទាំងអស់ត្រូវតាមដានស្ថានភាពទឹកជំនន់នេះយ៉ាងយកចិត្តទុកដាក់បំផុតហើយត្រូវត្រៀមលក្ខណៈឱ្យបានរួចរាល់ ដើម្បីសង្គ្រោះដល់បងប្អូនប្រជាពលរដ្ឋ ហើយត្រូវរាយការណ៍ជាប្រចាំដល់គណៈបញ្ជាការឯកភាពខេត្តដើម្បីមានវិធានការអន្តរាគមន៍បន្ទាន់ក្នុងករណីស្ថានភាពកាន់តែធ្ងន់ធ្ងរ។
សូមបញ្ជាក់ថា ចំពោះនៅស្រុកសំរោង មានទឹកជន់លិចចំនួន ៤ឃុំ មានឃុំលំចង់ ឃុំជំរះពេន ឃុំបឹងត្រាញ់ខាងត្បូង និងឃុំសឹង្ហ ស្មើរនឹង១២ភូមិ ប៉ះពាល់លើផ្ទៃដីស្រែ ផ្ទះ ដាំរួមផ្សំផ្សេងៗ ចំនួន ៧៥០ហិកតា៕
